Naʻe malōlō ha talavou Vainī ko ʻInoke Vala Pepa ʻoku tukuakiʻi ki hono tā ʻe he kau polisí he pongipongi Falaite 17 ʻo Nōvemá ʻo mate he veʻe halá ʻi he Hala Taufaʻahaú ofi ki he ʻapi SiasiMāmongá ʻi Vainī pē. ʻI ha fakamatala ʻa e Komisiona Polisí, Grant Oʻfee, naʻe fakahoko ha fuhuʻi Vainī ʻo hoko ai ʻa e fakatamakí. ʻI he taimi tatau naʻe pehē ʻe Grant Oʻfee naʻe kau ha kau polisi he paati ʻaia naʻe ʻikai ke nau ngāue, ka ʻoku ʻikai ke tukuakiʻi ha taha he lolotongá ni ki he pekia ʻaʻInoke Vala Pepá.
Ko e puipuituʻa nounou ʻo e meʻa naʻe hokó naʻe fakahoko ha maʻu kava mālohi ʻa e kau polisí ʻi he ʻapi pē ʻi Vainī pea pehē ki he tamaiki ʻakapulu Vainií ʻi ha toe ʻapi pe ʻi Vainī he pō tatau. ʻOku pehē naʻe ʻalu ʻatu ʻa ʻInoke Vala mo ha niʻihi ki he faiʻanga inu ʻa e kau polisí pea ne kamata ʻa e tōkehekehe. Fakatatau ki he ngaahi fakamatala falalaʻanga ʻoku maʻu ʻe he Keleʻá naʻe tuliʻi ʻe he toko tolu polisi ʻa ʻInoke Vala pea mo e tokotaha ko Solomone Lavaka kae pehē kia Pelimani Taufa.
Naʻe hao ʻa e ongo ua ko eé kae maʻu ʻa ʻInoke Vala, he ko e tamasiʻi ʻoku sino, he toumuʻa ʻo eʻapi ʻo Paea ʻIloá ʻi Vainī pē ʻo hoko ai ʻa e mole e moʻui ʻa ʻInoke Vala Pepá.
