ʻOku hoko atu pē tangi ʻa e Sea Mālōlō e Fale Alea ʻo Tongá, Nōpele Lasike, ki he Fakamaauʻanga Tangí, ʻi hono tautea $500 ia ʻe he Fakamaauʻanga Lahí hono maʻu e foʻi mahafu .22 ʻe 2 ʻi hono ʻapí, kae fakatatau ki ha fakamatala mei he Fale Aleá ʻi he Pulelulu 18 Siulai ní, kuo fakahifo ai ʻe he Tama Tuʻí, Tupou V, ʻa Lasike mei he lakanga Sea e Fale Aleá, pea toʻo foki mo hono hingoa nōpelé kae pehē ke ʻikai toe hoko ko e mēmipa ʻo e Fale Alea ʻo Tongá.
Fakatatau ki he fakamatala mei he Fale Aleá naʻe fakahoko ha tohi folofola mei he Tuʻí kia Lasike, ʻaia kuo ne ngāue ʻaki ʻa e Havea Hikuleʻo Tuʻuhetoka ʻi he ʻaho 17 Siulai ní, ʻo fakahā ko e tuʻutuʻuni eni fakatatau ki he kupu 61(2) (c) ʻo e Konisitūtone ʻo Tongá pea toe fakatatau ai pē ki he kupu 23 ʻo e Konisitūtoné ʻoku kamata lau eni mei he ʻaho naʻe tautea ai ia he Fakamaauʻanga Lahí, ʻi he ʻaho 9 Siulai ní.
Neongo ko e tautea $500 kuo hilifakí kae fakatatau ki he Konisitūtoné kapau ko e hia ʻoku moʻua ai ha nōpele ʻoku laka hake hono tautea ʻoku tohi he laó ʻi he taʻu ʻe 2, ʻe lava leva ke toʻo ʻa e hingoa nōpelé. Ko e tautea ki he maʻu mo e mahafu taʻefakalaó ko e taʻu ʻe 5.
ʻOku hoko hake leva ʻa Nōpele Tuʻihaʻateiho ʻa ia naʻe toki fili ke Tokoni Seá, ʻi hono fakanofo ʻo e Tokoni Sea Mālōloó, Nōpele Tuʻiʻāfitu ke Minisitā Moʻuí, ʻo leʻoleʻo ʻi he lakanga Sea e Fale Aleá.
ʻOku ʻiai foki mo e keisi ʻa e nōpele ko ení ʻoku toe mamafa ange ia ko e tukuakiʻi ki hono maʻu ha meʻatau taʻefakalao.
ʻOku ava ai e lakanga Tokoni Sea he Fale Aleá – kotoa eni he vahaʻa taimi ʻoku fai ai e alea ki he Fili Fakahā loto ke Fakahifo e Palēmiá.
Naʻe ʻamanaki foki ke hoko atu e pāloti ko ení ʻi he Tūsite 17 Siulai ní, ka naʻe toe toloi kae fakapapauʻi e tuʻunga e Sea ʻo e Fale Aleá ʻa eni kuo iku ki aí. Pea ʻoku hoko atu ai e aleá he Tuʻapulelulú ki he tali mei he puleʻangá ki hono tukuakiʻi ʻoku hā he tohi pāloti ke tukuhifo e Palēmiá.
