Kuo maʻu ʻe he Keleʻá ha fakamoʻoni pau mo falalaʻanga mei Fale Paʻanga, ʻo pehē naʻe teu ke folau ʻa e ʻEiki Minisitā Tānaki Tukuhau mo e Kasitomú, Hon. Feʻao Vakatā, ki tuʻapuleʻanga he konga ki muʻa ʻo e taʻu ní. Naʻá ne toho leva ʻene paʻanga folaú (per diem) ʻaia ko e taumuʻa e paʻanga ko ʻení ke totongiʻaki ʻene nofoʻanga he hōtelé mo e meʻakai etc. lolotonga ʻene ʻi tuʻapuleʻangá.
Kaekehe naʻe toho ʻe he ʻeiki minisitaé ia ʻene paʻanga folau lau afe ko ʻení ʻo ne ngāueʻaki ʻi Tongá ni pea ʻikai folau ia ki tuʻapuleʻanga ki he fakataha naʻe taumuʻa ki ai ʻa e petiumé.
Kae hili hono toki fakatokangaʻi atu mei Fale Paʻanga naʻe ʻikai folaú, pea fetuʻutaki atu leva ke fakafoki ange ʻa e paʻanga ko ʻeni he naʻe ʻikai folau. Meʻapango he naʻe fakahoko ange he minisitaá kuó ne ʻosi ngāueʻaki ʻa ʻene paʻanga folaú, kae tukuange ke ne toki tātā fakafoki ange mei he ʻene paʻanga nofo ( Housing Allowance ), ʻaia ko e $800 ʻeni ( ʻosi toʻo mei ai e tukuhau 20% ) ʻoku totongi fakamāhina ki he kau minisitaá.
Naʻe pehē ʻe ha Fakafofonga Lao ko e hia mataʻāʻā ʻeni ia he naʻe ʻosi mahino lelei pe ʻa e taumuʻa ia ke ngaueʻaki ki ai ʻa e paʻanga ko ʻení, ka naʻe ngāue ʻaki e paʻangá ni ia ki he meʻa kehe, pea kanoniʻaki naʻe ʻikai lava e folaú ia.
Ko e fehuʻí leva, kapau naʻe ʻikai fakatokangaʻi ʻe Fale Paʻanga, naʻe mei fakafoki nai ʻe he minisitaá ʻa e paʻangá ni pe ʻikai? Naʻe meaʻi nai ʻe he Palēmiá ʻa e founga ko ʻeni ʻa e minisitaá pe ʻikai? Mahalo kapau na ko ha kalake maʻulalo ʻeni kuo fuoloa hano kapusi.
